മുംബൈ ഇന്ത്യൻസിന്, ഇന്ത്യൻ ടീമിനേയും തോൽപ്പിക്കാനാവും ; മുൻ ഇന്ത്യൻ ഓപ്പണർ പറയുന്നു

ഇത്തവണത്തെ ഐപിഎൽ ചാമ്പ്യന്മാരായ മുംബൈ ഇന്ത്യൻസിന്, ഇന്ത്യൻ ദേശീയ ടീമിനെ പോലും തോൽപ്പിക്കാൻ കഴിയുമെന്ന് മുൻ ഇന്ത്യൻ ടെസ്റ്റ് ടീം ഓപ്പണറും, പ്രശസ്ത ക്രിക്കറ്റ് വിദഗ്ദ്ധനുമായ ആകാശ് ചോപ്ര. ബാറ്റിംഗിലും, ബോളിംഗിലും, ഫീൽഡിംഗിലും മുംബൈ അത്ര ശക്തരാണെന്നും ഇതിനൊപ്പം ചോപ്ര ചൂണ്ടിക്കാട്ടി. കഴിഞ്ഞ ദിവസം യൂടൂബിൽ പോസ്റ്റ് ചെയ്ത വീഡിയോയിലാണ് അദ്ദേഹം ഇങ്ങനെ അഭിപ്രായപ്പെട്ടത്.

മുംബൈയുടെ മധ്യനിര അതിശക്തമാണെന്നാണ് ചോപ്രയുടെ പക്ഷം. ഹാർദിക് പാ‌ണ്ട്യ, ക്രുനാൽ പാണ്ട്യ, കീറൺ പൊള്ളാർഡ് എന്നീ വെടിക്കെട്ട് ബാറ്റ്സ്മാന്മാർ അണിനിരക്കുന്ന തകർപ്പൻ മധ്യനിര അവർക്കുണ്ടെന്ന് പറയുന്ന അദ്ദേഹം മുംബൈ ടീമിലെ എല്ലാ താരങ്ങളും മാച്ച് വിന്നർമാരാവാൻ ശേഷിയുള്ളവരാണെന്ന് ചൂണ്ടിക്കാട്ടി.

ഈ മുംബൈ ഇന്ത്യൻസ് ടീമിന് പോരായ്മകളൊന്നും ഇല്ലെന്നാണ് ചോപ്ര അഭിപ്രായപ്പെടുന്നത്. ഇന്ത്യൻ ടീമും, മുംബൈ ഇന്ത്യൻസും തമ്മിൽ ഒരു ടി20 പരമ്പരയിൽ നേർക്കുനേർ വരികയും, ഇന്ത്യൻ താരങ്ങളായ രോഹിത് ശർമ്മ, ജസ്പ്രിത് ബുംറ, ഹാർദിക് പാ‌ണ്ട്യ എന്നിവർ മുംബൈ ഇന്ത്യൻസിൽ കളിക്കുകയും ചെയ്താൽ വിജയം ഐപിഎൽ ചാമ്പ്യന്മാർക്കൊപ്പമായിരിക്കുമെന്നും ഇതിനൊപ്പം അദ്ദേഹം ചൂണ്ടിക്കാട്ടി.

“ടീം ഇന്ത്യയുടെ ഏറ്റവും വലിയ കരുത്തായ ജസ്പ്രിത് ബുംറയുടെ ബോളിംഗ് മുംബൈയ്ക്കൊപ്പമുണ്ട്‌ ബാറ്റിംഗ് ഡെപ്ത്തിനെക്കുറിച്ച് പറയുകയാണെങ്കിൽ ക്രുനാൽ പാണ്ട്യ, ഹാർദിക് പാണ്ട്യ, കീറൺ പൊള്ളാർഡ് എന്നിവരാണ് അവരുടെ 5,6,7 സ്ഥാനങ്ങളിലുള്ളത്. ഇത് ഇന്ത്യൻ ടീമിന് ഉള്ളതിനേക്കാൾ മികച്ചതാണ്. ഡികോക്കും, രോഹിത് ശർമ്മയും ചേർന്നുള്ള ഓപ്പണിംഗ് കൂട്ടുകെട്ട്, ധവാൻ-രാഹുൽ ജോഡിക്ക് മികച്ച മത്സരം നൽകും.” ചോപ്ര പറഞ്ഞു.

The post മുംബൈ ഇന്ത്യൻസിന്, ഇന്ത്യൻ ടീമിനേയും തോൽപ്പിക്കാനാവും ; മുൻ ഇന്ത്യൻ ഓപ്പണർ പറയുന്നു appeared first on SPORTS MALAYALAM.

from SPORTS MALAYALAM https://ift.tt/2UnSeCI
via IFTTT