ജർമനിയെ തകർത്ത് തരിപ്പണമാക്കി സ്പെയിൻ; പോർച്ചു​ഗലിനും ഫ്രാൻസിനും ജയം

യുവേഫ നേഷൻസ് ലീ​ഗിൽ സൂപ്പർടീമുകളുടെ പോരാട്ടത്തിൽ ജർമനിയെ തകർത്ത് തരിപ്പണമാക്കി സ്പെയിൻ. എതിരില്ലാത്ത ആറ് ​ഗോളിനാണ് സ്പെയിൻ മുൻ ലോകചാമ്പ്യന്മാരെ ഒടിച്ചുമടക്കിവിട്ടത്. മറ്റ് പ്രധാന മത്സരങ്ങളിൽ ഫ്രാൻസും, പോർച്ചു​ഗലും ജയം നേടി.

സ്പെയിനിൽ നടന്ന മത്സരത്തിൽ ജർമനിക്ക് മേൽ സമ്പൂർണാധിപത്യമാണ് ആതിഥേയർ കാഴ്ചവച്ചത്. ഫെറാൻ ടോറസ് സ്പെയിനുവേണ്ടി ഹാട്രിക്ക് നേടി. അൽവാരോ മൊറാത്ത, റോഡ്രി, മൈക്കൽ ഓയാർസബാൾ എന്നിവരും സ്പാനിഷ് പടയ്ക്കായി വലകുലുക്കി. സ്പാനിഷ് ആക്രമണത്തിൽ പകച്ച ജർമനി ആകെ ​രണ്ട് ഷോട്ടുകൾ മാത്രമാണ് തൊടുത്തത് തന്നെ. ജയത്തോടെ സ്പെയിൻ ഫൈനൽസിലേക്ക് മുന്നേറി.

മറ്റൊരു മത്സരത്തിൽ സ്വീഡനെയാണ് ഫ്രാൻസ് തോൽപ്പിച്ചത്. രണ്ടിനെതിരെ നാല് ​ഗോളുകൾക്കായിരുന്നു ജയം. ഫ്രാൻസിനായി ഒളിവർ ജിറൂഡ് രണ്ട് ​ഗോൾ നേടി. ബെഞ്ചമിൻ പാവാർഡ്, കിങ്സ്ലി കോമാൻ എന്നിവരും ​ഗോളുകൾ നേടി. ജയത്തോടെ ഫ്രാൻസും നേഷൻസ് ലീ​ഗ് ഫൈനൽസിന് യോ​ഗ്യത നേടി.

മറ്റൊരു സൂപ്പർപോരാട്ടത്തിൽ ക്രൊയേഷ്യയെ രണ്ടിനെതിരെ മൂന്ന് ​ഗോളുകൾക്കാണ് പോർച്ചു​ഗൽ വീഴ്ത്തിയത്. പോർച്ചു​ഗലിനായി റൂബൻ ഡയസ് ഇരട്ട​ഗോൾ നേടി. ജാവോ പെലിക്സും ഒരു ​ഗോൾ നേടി. ക്രൊയേഷ്യയുടെ രണ്ട് ​ഗോളുകളും മറ്റേവോ കോവാസിച്ചിന്റെ വകയായിരുന്നു. മത്സരം ജയിച്ചെങ്കിലും ​ഗ്രൂപ്പ് ജേതാക്കളായ ഫ്രാൻസ് ഫൈനൽസിലേക്ക് മുന്നേറിയതോടെ കിരീടം നിലനിർത്താമെന്ന് പോർച്ചു​ഗീസ് സ്വപ്നം അവസാനിച്ചു.

The post ജർമനിയെ തകർത്ത് തരിപ്പണമാക്കി സ്പെയിൻ; പോർച്ചു​ഗലിനും ഫ്രാൻസിനും ജയം appeared first on SPORTS MALAYALAM.

from SPORTS MALAYALAM https://ift.tt/32PtYOz
via IFTTT