വീണ്ടും മെസി മാജിക്; അർജന്റീന ക്വാർട്ടറിൽ

ഖത്തർ ലോകകപ്പിൽ ക്വാർട്ടർ ഫൈനൽ ബർത്ത് ഉറപ്പാക്കി അർജന്റീന. പ്രീക്വാർട്ടർ പോരാട്ടത്തിൽ ഏഷ്യൻ പ്രതിനിധികളായ ഓസ്ട്രേലിയയെ തോൽപ്പിച്ചാണ് അർജന്റീന ക്വാർട്ടറിലേക്ക് മുന്നേറിയത്. ഒന്നിനെതിരെ രണ്ട് ​ഗോളുകൾക്കായിരുന്നു അർജന്റീനയുടെ ജയം.

ആയിരം കരിയർ മത്സരങ്ങളെന്ന നാഴികക്കല്ലുമായി കളത്തിലിറങ്ങിയ മെസിയാണ് ഇക്കുറിയും അർജന്റീനയ്ക്ക് ലീഡ് സമ്മാനിച്ചത്. 35-ാം മിനിറ്റിലായിരുന്നു ഈ ​ഗോൾ. മെസി തന്നെ എടുത്ത ഒരു ഫ്രീക്കിക്കിന്റെ തുടർച്ചയായാണ് ​ഗോൾ പിറന്നത്. പെനാൽറ്റി ബോക്സിനുള്ളിൽ വച്ച് നിക്കോളാസ് ഓട്ടാമെൻഡി നൽകിയ പന്ത് സ്വീകരിച്ച് കിടിലനൊരു ​ഗ്രൗണ്ട് ഷോട്ടിലൂടെയാണ് മെസി ഓസ്ട്രേലിയൻ വലകുലുക്കിയത്.

ഒരു ​ഗോൾ ലീഡുമായി ആദ്യ പകുതിയവസാനിപ്പിച്ച അർജന്റീന രണ്ടാം പകുതിയിലും മികവ് തുടർന്നു. 57-ാം മിനിറ്റിൽ അർജന്റീന ലീഡുയർത്തി. ഇക്കുറി ഓസ്ട്രേലിയൻ പ്രതിരോധനിരയുടേയും ​ഗോളിയുടേയും പിഴവ് മുതലെടുത്ത് ജൂലിയൻ അൽവാരസാണ് വലകുലുക്കിയത്. മത്സരത്തിന്റെ 77-ാം മിനിറ്റിൽ ഒരു സെൽഫ് ​ഗോൾ ഓസ്ട്രേലിയയുടെ പ്രതീക്ഷയുണർത്തി. ക്രെയി​ഗ് ​ഗുഡ്‌വിൻ തൊടുത്ത ഷോട്ട് അർജന്റൈൻ താരം എൻസോ ഫെർണാണ്ടിസിന്റെ മുഖത്തിടിച്ച്, വഴിതെറ്റി സ്വന്തം ​​ഗോൾവലിയിൽ പതിച്ചു. തുടർന്ന് ഒരു ​ഗോൾ കൂടി അടിക്കാൻ ഓസ്ട്രേലിയക്ക് സാധിക്കാതെ വന്നതോടെ അർജന്റീന ലോകകപ്പിന്റെ ക്വാർട്ടറിലേക്ക് രാജകീയമായി മുന്നേറി.

The post വീണ്ടും മെസി മാജിക്; അർജന്റീന ക്വാർട്ടറിൽ appeared first on SPORTS MALAYALAM.

from SPORTS MALAYALAM https://ift.tt/i1JvmgL
via IFTTT