വിന്നറടിച്ച് വിനി, കോ‌ട്ടകാത്ത് കോർട്ട്വ; വീണ്ടും റോയലായി റയൽ മഡ്രിഡ്

യുവേഫ ചാമ്പ്യൻസ് ലീ​ഗിൽ വീണ്ടും റയൽ മഡ്രിഡിന്റെ കിരീടനേട്ടം. ഫ്രാൻസിലെ പാരീസിൽ നടന്ന കലാശപ്പോരിൽ ഇം​ഗ്ലീഷ് കരുത്തരായ ലിവർപൂളിനെ എതിരില്ലാത്ത ഒരു ​ഗോളിന് വീഴ്ത്തിയാണ് റയലിന്റെ കിരീടധാരണം. ബ്രസീൽ താരം വിനിഷ്യസാണ് റയലിനായി വിജയ​ഗോൾ നേടിയത്.

പാരീസിലെ സ്റ്റേഡ് ഡെ ഫ്രാൻസിൽ നടന്ന പോരാട്ടം ശരിക്കും ലിവർപൂൾ മുന്നേറ്റനിരയും റയൽ ​ഗോളി തിബോ കോർട്ട്വയും തമ്മിലായിരുന്നു. മത്സരത്തിന്റെ തുടക്കം മുതൽ റയൽ ​ഗോൾമുഖം ആക്രമിക്കുകയായിരുന്നു മുഹമ്മദ് സാലയും, സാദിയോ മാനെയുമൊക്കെയടങ്ങുന്ന ചെമ്പട. എന്നാൽ ​ഗോളെന്നുറപ്പിച്ചതടക്കം ഒട്ടേറെ മിന്നൽ സേവുകൾ നടത്തിയാണ് ബെൽജിയൻ ​ഗോളി കോർട്ട്വ റയലിന്റെ കോട്ടകാത്തത്.

മത്സരത്തിന്റെ ഒഴുക്കിന് വിപരീതമായാണ് റയലിന്റെ വിജയ​ഗോൾ വീണത്. 64-ാം മിനിറ്റിൽ നിരപുപദ്രവകരമെന്ന തോന്നിക്കുന്ന ഒരു മുന്നേറ്റമാണ് വിജയ​ഗോളിലേക്ക് വഴിതെളിച്ചത്. ഫെഡെറിക്കോ വാൾവെർദെയുടെ ഉജ്ജ്വലപാസ് വലയിലേക്ക് തട്ടിയിടേണ്ട ആവശ്യമേ വിനിഷ്യസിനുണ്ടായിരുന്നുള്ളു.

​ഗോൾ വഴങ്ങിയതിന് പിന്നാലെയും തിരിച്ചടിക്കാനായിരുന്നു ലിവർപൂളിന്റെ ശ്രമം. എന്നാൽ കോർട്ട്വയ്ക്കും പ്രതിരോധനിരയ്ക്കും പുറമെ റയൽ മധ്യനിരയും ജാ​ഗ്രത പാലിച്ചതോടെ കിരീടമെന്ന മോഹം ലിവർപൂളിൽ നിന്നകന്നു.

The post വിന്നറടിച്ച് വിനി, കോ‌ട്ടകാത്ത് കോർട്ട്വ; വീണ്ടും റോയലായി റയൽ മഡ്രിഡ് appeared first on SPORTS MALAYALAM.

from SPORTS MALAYALAM https://ift.tt/LT0Jfa7
via IFTTT